Episode 1: Eskola no Biblioteka, Subdistritu Venilale

Eskola no Biblioteka: Escola do Reino de Venilale

Subdistritu Venilale, Baucau

Edifísiu ida ne’e, hamutuk ho uma seluk, mak hanesan edifísiu primeiru ne’ebe ema harii iha subdistritu Venilale, provínsia Baucau. Sira harii ida ne’e iha tinan 1933 hodi uza hanesan igreja ba ema Portugues nia atividades relijiozus.

Depois, sira halo sira nia atividades relijiozus iha edifísiu foun iha foho-oan nia leten, no sira halo mudansa ba edifísiu ida ne’e hodi kria eskola ida ne’ebé mak hanesan eskola públiku primeiru iha Timor-Leste tomak. Iha tempu ne’ebá, iha eskola rua deit: ida iha sub-distritu Soibada, provínsia Manatutu, no eskola ida ne’e.

Iha eskola rua hodi fahe estudiante sira tuir idade. Iha Venilale, sira simu estudiante ba Klase 1 to’o 4, no depois, estudiante sira tenke ba Soibada hodi tuir Klase 5 ba leten.

Iha parte primeiru, edukasaun ne’ebé estudiante sira simu iha Venilale mak limitadu tebes. Ema Portugues permite edukasaun ba ema boot balun de’it, hanesan lider lokal nia oan. Ema bainbain labele tuir tamba osan la to’o no razaun seluk tan. Durante tempu ida ne’e, eziste diferensa (no diskriminasaun) entre liurai ka lideransa sira, povu bainbain, no ema ki’ak. Ema ki’ik tenke serbisu maka’as tebes hodi selu ba ema boot nia oan nia edukasuan.

Depois de ema Indonesia tama iha 1975, ema estabelese orfanatu iha fatin ida ne’e. Sira mós harii uma ida, ne’ebé iha forma hanesan ‘L,’ iha edifísiu ida ne’e nia oin hodi uza hanesan eskola. Depois, sira muda orfanatu ba edifísiu ki’ik liu besik fatin ida ne’e.

Dala ida tan, ema halo mudansa ba edifísiu ida ne’e, no besik liu tinan independénsia Timor-Leste nian, edifísiu ida ne’e sai fali eskola. No depois, eis-Presidente Xanana Gusmão loke biblioteka foun. Durante ami nia viajen, bele hare fatin ida ne’ebé labarik ki’ik mak uza, karik hanesan eskola infantíl ka eskola relijiozu ba loron Domingu.

Iha ema lokal balun hela ne’ebé sei lembra kona-ba kuaze faze sira hotu-hotu ba istória edifísiu ida ne’e. Ami hakarak hatoo ‘obrigadu’ ba Sr. Silverto Hornain; nia halo entrevista hamutuk ho ami kona-ba istória edifísiu nian.

Erratum: Iha vídeo ida ne’e iha 1:12, nia hatete ‘Iha 1993…’ maibe, tuir loloos, tenke hanesan ‘Iha 1933…”



2 Responses to “Episode 1: Eskola no Biblioteka, Subdistritu Venilale”

  1. David Foster says:

    Good film, informative. Well done.

Leave a Reply