Episode 2: Pusat Kota Lama, Subdistritu Venilale

Pusat Kota Lama

Subdistritu Venilale, Baucau

Hau tenke hateten katak uma ne’e faxina hau tanba parese katak ida ne’e eziste iha fatin inkongruente: uma mak sunu, lumut taka edifísiu tomak, no ida ne’e tuur iha rai-luan iha sentru ba komunidade hakmatek.

Bainhira tropa Japaun sira sai iha tinan 1945, depois de sira okupa Timor-Leste ba tinan tolu, ida ne’e kria situasaun iha ne’ebé grupu ida la iha poder (‘vákuu’ ba poder); maibe bainhira ema Portuguese fila mai, sira mak kaer poder maisomenus imediamente. Sira hare’e katak presiza kria stabilidade, no ezije katak ema harii edifísiu ida lalais hodi sai hanesan sede subdistritu (hanesan camat) no sentru ba suku oioin iha Venilale.

Xefe suku sira nain lima* kria sistema ho rotasaun ba serbisu no husu povu sira atu ajuda ho konstrusaun ba edifísiu ida ne’e. Tanba sira la iha materiál ne’ebé lo’os, sira uza semen, fatuk, no ahi-kadesan. Tinan balun depois de projeitu remata, iha tinan 1956, sira mós uza uma ne’e hanesan fatin toba ba ema boot ne’ebé mai visita.

Iha 1975, membru partidu polítiku FRETILIN utiliza edifísiu ida ne’e hanesan baze komandu (markas komando) hodi prepara ba sira nia konfrontasaun rasik kontra partidu polítiku Timor seluk iha distritu Baucau. Sira kastigu maisomenus membru 25 UDT no APODETI nian ba kuaze loron 100.

Maski nune’e, iha parte ikus ba tinan, iha loron 7 Dezembru 1975, tropa Indonesia nian ne’ebé foin tama maka kaer kontrolu ba edifísiu ida ne’e husi FRETILIN no sira uza ida ne’e ba sira nia baze de komandu hodi buka luta nain sira. Ema Indonesia sei kontrola uma ne’e to’o tinan 1999 bainhira ema Timor halo referendu no vota ba ukun an. Parte didin mak metan tanba forsa Indonesia koko sunu uma ne’e bainhira sira sai (maibe iha mós posibilidade katak ema Timor mak sunu).

Apezarde insidente violente sira ne’e, ema Venilale sei hanoin di’ak kona-ba edifísiu ida ne’e tanba ne’e mak hanesan sentru atividade oioin durante periodu estavíl iha rai Timor. Nomós architektura Portugeuse nian mak furak, no uluk, durante okupasaun Indonesia, labarik sira gosta halimar besik ne’ebá. Tanba ida ne’e, povu sira senti triste katak iha tempu agora ema la uza edifísiu ida ne’e no uma mak abandonadu de’it.

Visitante balun sei mai Venilale ne’ebé interese ba istória edifísiu nian, no ida ne’e mak hanesan testemuñu ba uma ne’e nia importánsia ba membru komunidade Venilale durante tinan atus-ida liu ba.

Ami hakarak hato’o obrigadu ba Sr. Aleixo Ximenes ba istóriu ida ne’e.

* Suku nain lima maka: Uatu-Haco, Bado-Ho’o, Badomori, Uai-Oli, no Fatulia.



One Response to “Episode 2: Pusat Kota Lama, Subdistritu Venilale”

  1. Megan Power says:

    great to see the work you are doing Kamil – hope you can link up with the other Timor-Leste projects in development @UniMelb

Leave a Reply